హైదరాబాద్: తెలంగాణలోని నిరుద్యోగ యువతకు రాష్ట్ర ప్రభుత్వం తీపికబురు అందించింది. స్వయం ఉపాధి పొందాలనుకునే యువతకు ఆర్థిక సహాయం అందించేందుకు అమలు చేస్తున్న రాజీవ్ యువ వికాసం పథకం కింద అర్హులైన లబ్ధిదారులకు రూ.లక్ష సాయం అందించేందుకు ప్రభుత్వం చర్యలు చేపట్టింది. నవంబర్ 19 నుంచి ఈ ఆర్థిక సాయాన్ని పంపిణీ చేయాలని నిర్ణయించినట్లు సమాచారం.
ఈ మేరకు డిప్యూటీ సీఎం భట్టి విక్రమార్క అధికారులను ఆదేశించారు. అర్హులైన యువతకు సాయం త్వరగా అందేలా అవసరమైన ఏర్పాట్లను ముందుగానే పూర్తి చేయాలని సూచించారు.
ఇప్పటికే పూర్తయిన దరఖాస్తుల ప్రక్రియ
రాజీవ్ యువ వికాసం పథకం ద్వారా స్వయం ఉపాధి పొందాలనుకునే యువతకు ప్రభుత్వం ఆర్థిక సహాయం అందిస్తోంది. ఇందుకోసం గతంలోనే అర్హులైన యువతీ యువకుల నుంచి ఆన్‌లైన్‌లో దరఖాస్తులు స్వీకరించారు. మార్చి 17 నుంచి ఏప్రిల్ 14 వరకు దరఖాస్తుల ప్రక్రియ కొనసాగింది. దరఖాస్తులను పరిశీలించిన అనంతరం అర్హులైన లబ్ధిదారులను ఎంపిక చేసి తుది జాబితాను రూపొందించారు.
ఎంపికైన వారికి నవంబర్ నుంచి ఆర్థిక సాయం అందించేందుకు ప్రభుత్వం ఏర్పాట్లు చేస్తోంది. ఈ నగదును నేరుగా లబ్ధిదారుల బ్యాంకు ఖాతాల్లో జమ చేయనున్నారు.
ఎస్సీ, ఎస్టీ, బీసీ, మైనార్టీ యువతకు అవకాశం
రాజీవ్ యువ వికాసం పథకం కింద ఎస్సీ, ఎస్టీ, బీసీ, మైనార్టీ వర్గాలకు చెందిన నిరుద్యోగ యువతకు ఆర్థిక సహాయం అందించనున్నారు. ప్రభుత్వం అందించే సాయంతో యువత తమకు నచ్చిన రంగాల్లో స్వయం ఉపాధి అవకాశాలను ఏర్పాటు చేసుకునే అవకాశం ఉంటుంది.
More Read
అధికారులతో భట్టి విక్రమార్క సమీక్ష
ప్రజాభవన్‌లో ఎస్సీ, ఎస్టీ సంక్షేమ శాఖల అధికారులతో డిప్యూటీ సీఎం భట్టి విక్రమార్క సమీక్ష సమావేశం నిర్వహించారు. ఈ సమావేశంలో సాంఘిక సంక్షేమ శాఖ మంత్రి అడ్లూరి లక్ష్మణ్‌తో పాటు అధికారులు పాల్గొన్నారు. రాజీవ్ యువ వికాసం పథకం అమలుపై ప్రధానంగా చర్చించారు.
ఎంపికైన యువతకు ఆర్థిక సాయం ఆలస్యం కాకుండా నవంబర్ 19 నుంచి పంపిణీ చేసేందుకు అవసరమైన చర్యలు చేపట్టాలని భట్టి విక్రమార్క అధికారులను ఆదేశించారు. దీంతో పాటు యువతకు ఉపాధి అవకాశాలు, సంక్షేమ పథకాల అమలు, గురుకులాల నిర్వహణ వంటి అంశాలపై కూడా సమీక్షించారు.
విద్యారంగ అభివృద్ధికి నిధుల కొరత లేకుండా చర్యలు తీసుకోవాలని అధికారులకు సూచించారు.
