తెలంగాణ బీజేపీలో గత కొంతకాలంగా కొనసాగుతున్న వర్గపోరుకు రాష్ట్ర నాయకత్వం తెరదించింది. పార్టీలో కీలక నేతల మధ్య నెలకొన్న విభేదాల కారణంగా పెండింగ్లో ఉన్న మూడు జిల్లాల అధ్యక్షుల నియామకాలను రాష్ట్ర అధ్యక్షుడు రాంచందర్ రావు ఖరారు చేశారు. దీంతో పార్టీ శ్రేణుల్లో నెలకొన్న ఉత్కంఠకు ముగింపు పలికినట్లైంది.
కరీంనగర్, వికారాబాద్, మేడ్చల్ (అర్బన్) జిల్లాల అధ్యక్షుల ఎంపికపై ఈటల రాజేందర్, బండి సంజయ్ వర్గాల మధ్య గత కొన్ని రోజులుగా తీవ్ర స్థాయిలో చర్చలు సాగాయి. ఇరువర్గాలు తమకు అనుకూలమైన నాయకత్వాన్ని కోరడంతో తుది నిర్ణయం ఆలస్యమైంది. పలుమార్లు సమావేశాలు జరిగినప్పటికీ ఏకాభిప్రాయం కుదరలేదు.
చివరకు రాష్ట్ర నాయకత్వం మధ్యవర్తిత్వం చేయడంతో ఇరువర్గాల మధ్య సయోధ్య కుదిరింది. అన్ని వర్గాలకు ఆమోదయోగ్యంగా ఉండే నాయకులను ఎంపిక చేస్తూ కరీంనగర్ జిల్లా అధ్యక్షుడిగా సాయి మల్లేశం, వికారాబాద్ జిల్లా అధ్యక్షుడిగా యూ. రమేశ్, మేడ్చల్ (అర్బన్) జిల్లా అధ్యక్షుడిగా గిరివర్ధన్ రెడ్డిలను నియమిస్తూ అధికారిక ఉత్తర్వులు విడుదలయ్యాయి.
ఈ నియామకాలతో జిల్లాల్లో పార్టీ కార్యకలాపాలు మరింత వేగం పుంజుకుంటాయని నాయకత్వం భావిస్తోంది. రాబోయే ఎన్నికలను దృష్టిలో పెట్టుకుని సంస్థాగతంగా పార్టీని మరింత బలోపేతం చేయడంలో ఈ నిర్ణయం కీలకంగా మారనుంది. కొత్త అధ్యక్షులు బూత్ స్థాయి నుంచి జిల్లా స్థాయి వరకు పార్టీని సమన్వయం చేస్తూ కార్యకర్తలను ఒకే తాటిపైకి తీసుకురావాల్సిన బాధ్యతను నిర్వహించనున్నారు.
రాష్ట్ర నాయకత్వం తీసుకున్న ఈ నిర్ణయంతో పార్టీలోని అంతర్గత విభేదాలు తగ్గి, సంస్థాగత బలోపేతానికి మార్గం సుగమమవుతుందని రాజకీయ విశ్లేషకులు అభిప్రాయపడుతున్నారు. అదే సమయంలో బీజేపీ కార్యకర్తలు కొత్త అధ్యక్షులకు అభినందనలు తెలుపుతూ, జిల్లాల్లో పార్టీ విస్తరణకు కొత్త ఊపు వస్తుందని ఆశాభావం వ్యక్తం చేస్తున్నారు.
