రోజూ తినే ఆహారంలో చిన్న మార్పు చేసుకోవడం ద్వారా శరీరానికి అవసరమైన ఫైబర్, ప్రోటీన్ను పెంచుకోవచ్చు. ఇందుకోసం అన్నంలో ఒక కప్పు పచ్చిబఠానీలు కలుపుకోవాలని నిపుణులు సూచిస్తున్నారు. పచ్చిబఠానీలు రుచిని పెంచడమే కాకుండా పోషక విలువలను కూడా మెరుగుపరుస్తాయి.
ఒక కప్పు పచ్చిబఠానీల ద్వారా సుమారు 10 గ్రాముల ఫైబర్, 8.6 గ్రాముల ప్రోటీన్ లభిస్తుంది. ఫైబర్ ఎక్కువగా ఉండటం వల్ల ఎక్కువసేపు కడుపు నిండినట్లు అనిపిస్తుంది. దీంతో తరచూ ఆకలి వేయడం, అనవసరంగా స్నాక్స్ తినడం తగ్గే అవకాశం ఉంటుంది. అంతేకాకుండా జీర్ణక్రియ, పేగుల ఆరోగ్యానికి కూడా ఫైబర్ ఉపయోగకరంగా ఉంటుంది.
పచ్చిబఠానీలు మాత్రమే కాకుండా ఫైబర్ అధికంగా ఉండే ఇతర ఆహారాలను కూడా రోజువారీ మెనూలో చేర్చుకోవాలి. పెద్దలకు రోజుకు సుమారు 30 గ్రాముల ఫైబర్ అవసరమని అమెరికన్ ఇన్స్టిట్యూట్ ఫర్ క్యాన్సర్ రీసెర్చ్ పేర్కొంది. తెల్ల బియ్యం, వైట్ బ్రెడ్కు బదులుగా బ్రౌన్ రైస్, హోల్ వీట్ బ్రెడ్, క్వినోవా వంటి సంపూర్ణ ధాన్యాలను ఎంచుకోవచ్చు.
అలాగే కందిపప్పు, శనగలు, బీన్స్ వంటి పప్పుధాన్యాలను కూరలు, సలాడ్లు, పులుసుల్లో చేర్చుకోవడం ద్వారా ఫైబర్ను పెంచుకోవచ్చు. అల్పాహారంలో ఓట్స్, స్మూతీలు లేదా పెరుగులో చియా గింజలు కలుపుకోవడం కూడా మంచి ఎంపిక. ఆపిల్, బేరి వంటి పండ్లను తొక్కతో తినడం, బాదం, పిస్తా, నూనె లేకుండా తయారు చేసిన పాప్కార్న్ వంటి ఆరోగ్యకరమైన స్నాక్స్ తీసుకోవడం ద్వారా కూడా రోజువారీ ఫైబర్ అవసరాన్ని చేరుకోవచ్చు.
గమనిక: వ్యక్తిగత ఆరోగ్య పరిస్థితులు, ఆహార అవసరాలను బట్టి ఫైబర్ అవసరం మారవచ్చు. ఫైబర్ను ఒక్కసారిగా ఎక్కువగా పెంచకుండా క్రమంగా పెంచుతూ తగినంత నీరు తాగడం మంచిది.
