గిఫు: 44 ఏళ్ల నిరీక్షణకు తెరపడింది. భారత మహిళల హాకీ జట్టు ఆసియా క్రీడల్లో మళ్లీ స్వర్ణ పతకాన్ని ముద్దాడింది. జపాన్‌లో జరిగిన 2026 ఆసియా క్రీడల ఫైనల్లో చైనాను 1-0తో ఓడించి చరిత్ర సృష్టించింది.
మ్యాచ్ ప్రారంభమైన 10వ నిమిషంలోనే లాల్రెమ్‌సియామి భారత్‌కు గోల్ అందించింది. తన 200వ అంతర్జాతీయ మ్యాచ్‌లో ఆమె కొట్టిన అద్భుతమైన రివర్స్-స్టిక్ షాట్ నేరుగా చైనా గోల్‌పోస్ట్‌లోకి దూసుకెళ్లింది. భారత్‌కు లభించిన ఆ ఒక్క గోల్ చివరి వరకు నిలిచింది.
చైనా దాడులు.. సవితా గోడ!
గోల్ తర్వాత చైనా దూకుడు పెంచింది. వరుస దాడులతో భారత గోల్‌పోస్ట్‌పై ఒత్తిడి తెచ్చింది. ఒక దశలో పెనాల్టీ స్ట్రోక్ కూడా లభించింది. అయితే సవితా పూనియా అద్భుతమైన సేవ్‌తో చైనాకు గోల్ దక్కకుండా అడ్డుకున్నారు. భారత డిఫెన్స్ కూడా అద్భుతంగా పోరాడింది.
చివరి నిమిషాల్లో చైనా గోల్‌కీపర్‌ను బయటకు పంపి అదనపు ఆటగాడితో దాడి చేసినా.. భారత అమ్మాయిలు ఏమాత్రం వెనక్కి తగ్గలేదు. చివరి హూటర్ మోగే వరకు ఆధిక్యాన్ని కాపాడుకుని 1-0 విజయాన్ని సొంతం చేసుకున్నారు.
1982 తర్వాత ఇదే తొలిసారి!
1982 తర్వాత ఆసియా క్రీడల మహిళల హాకీలో భారత్‌కు ఇదే తొలి స్వర్ణం. 1998, 2018లో ఫైనల్‌కు చేరిన భారత్ రజత పతకాలతో సరిపెట్టుకుంది. ఈసారి మాత్రం ఫైనల్లో చైనాను ఓడించి బంగారు పతకాన్ని సొంతం చేసుకుంది.
ఈ గెలుపుతో భారత్ 2028 లాస్ ఏంజిల్స్ ఒలింపిక్స్‌కు నేరుగా అర్హత సాధించింది.
ఫైనల్ హూటర్ తర్వాత భారత క్రీడాకారిణుల ఆనందానికి అవధుల్లేకుండా పోయాయి. మైదానంలోనే ఒకరినొకరు హత్తుకుంటూ.. డ్యాన్స్ చేస్తూ సంబరాలు చేసుకున్నారు. 44 ఏళ్ల కలను సాకారం చేసుకున్న భారత మహిళల హాకీ జట్టు కొత్త చరిత్రను లిఖించింది.
