స్పెర్మ్ కౌంట్ ఎక్కువగా ఉన్నా తండ్రి కాలేరా? అసలు విషయం ఇదే!

పురుషుల సంతానోత్పత్తి గురించి మాట్లాడేటప్పుడు చాలామంది ముందుగా స్పెర్మ్ కౌంట్ గురించే ఆలోచిస్తారు. అయితే కేవలం వీర్య కణాల సంఖ్య ఎక్కువగా ఉండటం మాత్రమే గర్భధారణకు హామీ ఇవ్వదని వైద్య నిపుణులు చెబుతున్నారు. స్పెర్మ్ కౌంట్‌తో పాటు వాటి కదలిక, ఆకృతి, నాణ్యత కూడా ముఖ్యమే.

స్పెర్మ్ కౌంట్ తక్కువగా ఉన్నా.. అందులోని కొన్ని శుక్రకణాలు ఆరోగ్యంగా, చురుగ్గా ఉంటే సహజ గర్భధారణ సాధ్యమయ్యే అవకాశం ఉంటుంది. మరోవైపు కౌంట్ ఎక్కువగా ఉన్నప్పటికీ కదలిక సరిగా లేకపోవడం లేదా ఆకృతిలో లోపాలు ఉంటే అండాన్ని చేరుకుని ఫలదీకరణం జరగడంలో ఇబ్బందులు ఎదురుకావచ్చు.

పురుషుల సంతానోత్పత్తిని ప్రభావితం చేసే కారణాల్లో హార్మోన్ల సమస్యలు, కొన్ని ఇన్ఫెక్షన్లు, ఊబకాయం, మధుమేహం, ధూమపానం, అధిక మద్యం సేవనం వంటి అంశాలు ఉండవచ్చు.

సంతానలేమి సమస్య ఉన్నప్పుడు పురుషుడు, మహిళ ఇద్దరూ వైద్య పరీక్షలు చేయించుకోవాలి. సాధారణంగా 12 నెలల పాటు గర్భనిరోధకం లేకుండా ప్రయత్నించినా గర్భం దాల్చకపోతే వైద్యులను సంప్రదించాలని నిపుణులు సూచిస్తున్నారు.

ముఖ్యంగా గుర్తుంచుకోవాల్సింది: స్పెర్మ్ కౌంట్ ఒక్కటే కాదు.. మొత్తం స్పెర్మ్ ఆరోగ్యం, ఇద్దరు భాగస్వాముల ఆరోగ్య పరిస్థితులు, ఇతర వైద్య కారణాలన్నీ కలిసి గర్భధారణ అవకాశాలను ప్రభావితం చేస్తాయి.

గమనిక: ఈ సమాచారం సాధారణ అవగాహన కోసం మాత్రమే. సంతానలేమి సమస్యకు వ్యక్తిగత వైద్య సలహా కోసం ఫెర్టిలిటీ స్పెషలిస్ట్ లేదా యూరాలజిస్ట్‌ను సంప్రదించాలి.